பெரும்பாலான மக்கள் உள்ளூரைச் சுற்றிப் பார்க்க தங்களிடம் உள்ள கார், பைக் போன்றவை அல்லது பொது போக்குவரத்தை பயன்படுத்துவார்கள். ஆனால் இதற்கு நேர்மாறாக அமெரிக்காவைச் சேர்ந்த கிறிஸ்டியன் பார்சன்ஸ் மற்றும் அலெக்சிஸ் ஸ்டீபன்ஸ் ஜோடி தங்களுடன் வீட்டையும் ஊர் சுற்றிப் பார்க்க அழைத்துச் சென்றிருக்கிறார்கள். இந்த வீடு வெறும் 130 சதுர அடி மட்டுமே மேலும் உலகில் அதிகம் பயணித்த வீடு என்ற சாதனையை படைத்துள்ளது.
இதைக் கொண்டு, இந்த தம்பதியினர் அமெரிக்காவில் உள்ள 37 மாநிலங்கள் மற்றும் 16 தேசிய பூங்காக்களுக்கு சென்றுள்ளனர். அவர்களின் இந்த வீட்டில் இரண்டு லோஃப்ட்கள், ஒரு பணியிடம் மற்றும் ஒரு ஷூ ரேக் ஆகியவை உள்ளன.
வட அமெரிக்காவில் உள்ள மிச்சிகன் ஏரிக்கு பயணம் மேற்கொண்ட போதுதான் அவர்களுக்கு இந்த யோசனை தோன்றியதாகவும், அன்று முதலே இதற்காக செய்யும் அனைத்து வேலைகளையும் ஆவணப்படுத்தத் தொடங்கி விட்டதாகக் கூறினர்.
ஸ்டீபன்ஸ் தனது மார்க்கெட்டிங் வேலையை விட்டுவிட்டு முழு நேரமும் இந்த வீட்டை உருவாக்குவதில் நேரத்தை செலவிட்டார். இருவருக்கும் படம் தயாரிக்கும் ஆர்வம் முன்பே இருந்து வந்ததால் அவர்கள் அதிகம் பயணிக்க விரும்பினர், அதற்காக ஒரு சிறிய வீடும் தேவைப்பட்டது. இதனை கருத்தில் கொண்டு 9 மாதங்களில் சக்கரங்கள் கொண்ட அழகிய வீடு ஒன்றை உருவாக்கினர். பார்சன்ஸும் பகுதி நேர பணியாளராக இருந்ததால், அவரது நண்பர்கள் மற்றும் குடும்பத்தினருடன் இணைந்து இந்த வீட்டைக் குறுகிய காலத்தில் கட்ட முடிந்தது.
இந்த வீட்டைக் கட்ட கிட்டத்தட்ட மொத்தம் 20 ஆயிரம் டாலர் செலவிடப்பட்டிருக்கிறது. மறுசுழற்சி செய்யப்பட்ட பொருட்கள் மற்றும் மரங்களால் ஆன வீடு என்பதால் அதிகம் செலவில்லாமல் முடிந்து விட்டது. செலவு என்பது அவர்கள் செல்லும் இடத்தை பொறுத்துத்தான் கூற முடியும் என்றும் அவர்கள் தெரிவிக்கின்றனர்.